Honnes 280

Aus Flerschemerisch.de

Wechseln zu: Navigation, Suche

Was merr so babbeld

Ich habb aach was gefunne.

So?

Willsde nitt wisse was ich gefunne habb?

Was hosden gefunne?

Enn Knobb.

Unn warum verzählsde merr dess?

Weil ich den in doiner Hos gefunne habb.

In moiner Hos war also enn Knobb.

Ja. Enn Bluseknobb.

Enn Bluseknobb?

Ja, enn Knobb ferr e Dameblus.

Woher waaßden dasses enn Bluseknobb iss?

Ich kenn doch Knebb.

Ah ja, unn jetz?

Jetz will ich wisse wie so enn Knobb ...

... in moi Hosedasch kimmt, stimmts?

Ja, dess will ich wisse.

Den habb ich gefunne.

Nitt irgendwo abgedreht?

Wo soll ich dann so enn Knobb abdrehe?

Waaß ichs?

Also naa. Ich habb den im Herrsch gefunne.

So, im Herrsch, omm Stommdisch villeischd.

Ja, doo hotter uff moim Stuhl geleesche.

Unn doo hosden oigesteggd?

Ja, doo habb ich den oigesteggd.

Warum hosden den nitt de Werrtin gewwe?

Den Knobb de Werrtin gewwe?

Ja, villeischd hott die den verlorn.

Gut, dess hätt ich mache kenne.

Hessdess emol gemacht ...

... dann hättsden nitt gefunne.

So isses.

Unn du hättst nitt gefroochd.

Ja, so isses.

Also ...

Also was?

Also, ich habb den oigesteckt weesche ...

... weesche was?

Weesche de Fantasie.

Weesche de Fantasie?

Weil so enn abbene Knobb die ooreeche dut.

Doi Fantasie ooreesche dut? Ha-ha!

Ja, wie kimmt der doohie unn su.

Der iss halt uff de Stuhl gefalle.

Ja, weiler lose war. Awwer warum?

Unn dess iss was ferr doi Fantasie?

Genau.

E bissi weit ewegg iss dess schunn.

Fantasie iss immer weit ewegg.

Awwer warum denn in die Ferne schweifen ...

Wie moonsden dess?

No ja, du kennst joo aach widder mol ...

Bei dir enn Knobb lose mache?

Ja, villeischd. Odder?

Ach Fraa, doodeferr sinn merr doch zu alt,

unn außerdem iss so enn Knobb was

ferr die Fantasie unn nitt ferr die Arwett.


Eiern Honnes

→ zurück

Meine Werkzeuge