Honnes 285
Aus Flerschemerisch.de
Flerschemerisch iss schee
... unn dess saach nitt nor ich, naa, aach enn ausgewachsene Professer, dess iss de Dr. Ernst Erich Metzner aus Risselsem. Unn deshalb hawwe merr sesomme mett emm junge Monn aus Flerschem, der sich auskennt mette Computer unn Alexander Rühl heeßt, e Seit gemacht im Internet, die heeßt flerschemerisch.de unn iss e elektronisch Werrderbuch. Uff dere Seit – dess heeßt so, awwer ess sinn mittlerweile schunn enn Haufe Seite! – wolle merr festhalle, wie dess Flerschemerische gebabbelt unn vor allem, wies geschriwwe werrd.
Dess heert sich so leicht oo, awwer hott ooner von eich dess schunn emol versucht? Gut, ich (unn doodemett Eiern Honnes) habb mehr als 280 Honnesse im Flerschemer Blättche geschriwwe, awwer ich moon halt, dass ess noch mehr Flerschemer Leit gewwe dut, die gern emol in unserne Mundart schreiwe dete, awwer sich nit getraue, weil se Ängst hawwe, sie dete was falsch mache.
Jetz iss joo nitt gesaat, dass ich alles rischdisch mache unn schreiwe due, naa, unn dessdeweeche iss die Sach im Internet so gemacht, dass wer immer moont, er kennt was dezu beitraache, sich oiklinke unn Stellung nemme konn. Dann werrd, in e paar Monat odder villeicht erst in oons, zwaa Johrn, ebbes vorlieh, was merr dann in emm rischdische Buch, in emm „Flerschemer Werrderbuch“, unner die Leit brenge konn.
Jetz konn ooner saache, ei so Werrdebicher gibt’s doch schunn längst, ei gucke mol im Buchlade, doo finnsde enn gonze Haufe unn was wollt ihr dann noch. Ja, dess stimmt, awwer jed Mundart iss onnersder, sie ännert sich von Ort zu Ort, merr brauch nor nooch Hochem odder nooch Raunem, Fronkfort odder Meenz ze gieh, iwwerall werrd e onner Mundart gebabbelt unn iwwerall werrdse onnerst geschriwwe. Grad bei uns gibt’s joo mettem Moo unn mettem Boo unn mettem joo su vill Werrder mett emm longe o, dies schunn aach in de Näh von Flerschem nimmi so gibt.
Also wolle merr was mache, ess iss enn Haufe Arwett, awwer ess mächt Spass, weil aach so enn junge Mensch mettmache dut, unn merr eichentlich denke kennt, so e Mundart wie die flerschemer werrd mett uns Ältere aussterwe. Awwer ess gibt halt immer mehr Leid, die saache nitt nor, merr misst unser Muttersprooch erhalle unn aach uffschreiwe, naa, ess gibt, so denk ich, aach Leit, die dann wennse wisse wies geschriwwe werrd, aach in de Mundart dichte odder Geschichte schreiwe odder der, wenn ich emol uffheer mettem Honnes im Blättche, moin Noochfolcher werrd, Eiern Schorsch zum Beispiel.
Also, wer Internet hott konn schunn emol enoigucke in www.flerschemerisch.de unn konn debei nitt nor schunn enn Haufe Werrder in Hochsprooch unn Mundart finne, er konn aach, wenner ins Mundart-Portal gieht, e Zwiegespräch vom Honnes mette Renate Mohr heern.
So, unn wenn die gonz Sach in emm Pressetermin publik gemacht worrn iss kennder noochlese, wie die Internet-Seit von unseren Zeidunge ringserum uffgenumme worrn iss.
Eiern Honnes
